Дүниежүзілік жабайы табиғат қоры (WWF) ұйымдастыратын бұл бастама аясында 2026 жылғы 28 наурыз күні сағат 20:30-дан 21:30-ға дейін компанияның орталық аппаратында электр энергиясын пайдалану толық тоқтатылды. Ал Қаражанбас кен орнында энергия тұтыну көлемі ішінара қысқартылды.

«Жер сағаты» – тек электр қуатын үнемдеуге бағытталған шара ғана емес, сонымен қатар климаттың өзгеруіне қарсы күресуге, табиғатты қорғауға және қоғамда экологиялық жауапкершілікті арттыруға үндейтін маңызды экологиялық акция.

«Қаражанбасмұнай» АҚ жұмысшылары қызмет барысындағы тәуекелдерді басқару бойынша білімін нығайтты. Оқуды компанияның ішкі тренерлер мектебінің мүшесі, сапа бойынша жетекші инженер Ағзам Бекентаев жүргізді. Құрылымдық бөлімшелер мамандары тәуекелдерді басқарудың негізгі қағидаларымен танысып, тәуекел ұғымы мен факторларының мәнін, олардың компания жұмысына әсерін жан-жақты қарастырды. Сондай-ақ тәуекелдерді алдын ала анықтау, бағалау және оларды тиімді басқару тәсілдері түсіндірілді.

Оқуда компаниядағы тәуекелдерді басқару жүйесінің құрылымы, жауапкершілік деңгейлері мен негізгі құралдарына назар аударылды. Сонымен қатар тәуекелдерді басқарудағы халықаралық стандарттар мен озық тәжірибелер туралы ақпарат берілді. Тренер тәуекелдерді алдын ала болжау мен уақтылы әрекет ету компанияның уақыты мен қаржысын үнемдеп, тұрақты дамуына және беделін сақтауға мүмкіндік беретінін ерекше атап өтті.

Мамандардың біліктілігін арттыру жолында ішкі тренерлер мектебінің рөлі зор. Бұл бастама компания қызметкерлерінің сауатын арттырып қана қоймай, ұжым ішінде білім мен тәжірибені тиімді таратуға, корпоративтік мәдениетті нығайтуға ықпал етеді.

«Қаражанбасмұнай» АҚ ұжымы наурызнама онкүндігінің қорытындысы – Тазару күні экологиялық акцияға белсенді қатысты. Табиғатқа жанашырлық пен тазалық мәдениетін насихаттауға бағытталған шара кен орны және кеңсе қызметкерлерін ортақ игі іске жұмылдырды.

№3 мұнай өндіру цехы жұмысшылары өндірісті абаттандыруға үлес қосып, цех айналасына тал егіп, аумақты тұрмыстық қалдықтардан тазартты. Бұл бастама еңбек ұжымының қоршаған ортаға деген жауапкершілігін айқындай түсті.

Орталық кеңсе қызметкерлері де игі істен шет қалмай, облыстық Бекет ата мешіті маңына ағаш отырғызды. Акция аясында теңіз жағалауында сенбілік ұйымдастырылып, қызметкерлер белгіленген учаскедегі қоқыстарды жинады.

Тазару күні – адам мен табиғаттың жаңарып, айналаны таза ұстау арқылы жаңа кезеңге басуын білдіретін маңызды күн. Қаражанбас мұнайшылары тек бұл күні ғана емес, қоршаған ортаны қорғауды әдетке айналдырып, тазалық пен жанашырлық құндылықтарын әрдайым берік ұстанады.

Ұлыстың ұлы күні қарсаңында Қаражанбас мұнайшылары дәстүр мен жаңғырудың үндестігін сезініп, бір шаңырақ астында бас қосты. Кен орнында компания мен кәсіподақ ұйымы бірлесіп, ашық аспан астында мерекелік концерт ұйымдастырды.

Шараға ҚБМ Басқармасы, кәсіподақ төрағасы, өндірістік басқарма басшылары қатысты. Бас директор Нұртаза Ибрашев ұжымды мерекемен құттықтап, қазақи құндылықтар ұлықталатын мейрам – ұлт тамырының тереңде екенін дәлелдейтінін атап өтті.

«Наурыз – жаңару мен жаңғырудың, береке мен бірліктің мерекесі. Осының арқасында біз тек өндірістік міндеттерді ғана емес, ұжымдық рухты көтеретін, дәстүр мен мәдениетті дәріптейтін маңызды бастамаларды да бірге жүзеге асырып келеміз. Бізді алда үлкен мақсаттар мен маңызды міндеттер күтіп тұр. Сол жолда әрқайсымыздың еңбегіміз, жауапкершілігіміз бен бірлігіміз аса маңызды. Наурыз күні сіздерге зор денсаулық, отбасыңызға амандық, еңбегіңізге табыс тілеймін!»,- деді Н.Ибрашев.

Вахталық кентте мереке көркі қыза түсті. Мұнда киіз үйлер тігіліп, ақ дастархан жайылып, көпшілікке ұлттық тағамдар ұсынылды. Мұнайшылар қой көтеру, арқан тарту және қазақша күрес секілді ұлттық спорт ойындарынан сайысқа түсіп, жүзден жүйрік шыққандар марапатқа ие болды. Салтанатты кеште облыс өнерпаздары мен Қазақстан эстрадасының әншісі Әділет Жауғашар көпшілікке көтеріңкі көңіл күй сыйлап, сүйікті әндерін орындады.

Наурыз мейрамы – тек жаңару мен берекенің емес, сондай-ақ ауызбіршілік пен татулықтың нышаны. Қаражанбастағы Ұлыстың ұлы күні компания мен кәсіподақ ынтымақтастығын, ортақ мақсат жолындағы бірлігін айқындай түсті.

Қаражанбас кен орнында «Салауатты сана» керуені өтті. Маңғыстау облысының ақпарат және қоғамдық даму басқармасы ұйымдастырған шараның мақсаты – қоғамдағы өзекті әлеуметтік мәселелердің алдын алу, салауатты өмір салтын насихаттау және еңбек ұжымдары арасында түсіндіру жұмыстарын күшейту.

Керуенге өңірдің қоғам белсенділері, облыстық ақсақалдар және аналар кеңесінің өкілдері, мемлекеттік органдар мен қоғамдық ұйымдардың мүшелері, сондай-ақ мұнай-газ саласының қызметкерлері қатысты. Спикерлер қоғамға қауіп төндіретін бес негізгі әлеуметтік кесел – нашақорлық, лудомания, тұрмыстық зорлық-зомбылық, вандализм және ысырапшылдықтың алдын алу бағытында пікірін ортаға салды. Ашық диалог форматындағы жүздесуде жұмысшылар өздерін толғандырған сауалдарын қойып, мәселелерді көпшілікпен бірге талқылады.

«Салауатты сана» керуені – қоғамдағы теріс құбылыстарға қарсы иммунитет қалыптастыруға бағытталған маңызды бастама. Жоба аясында өңірде ақпараттық-түсіндіру жұмыстары жүйелі жүргізіліп келеді. Мұндай кездесулер әлеуметтік кеселдердің алдын алу, сана мен жауапкершілікті арттыру, тұрақтылық, отбасы құндылықтар мен қоғамдық бірлікті нығайтуға оң әсер етеді.

«Қаражанбасмұнай» АҚ-ның футзалдан құрама командасы Маңғыстау облысының біріншілігінде жеңімпаз атанды. Жоғары лига ойындарында 16 команда бақ сынап, екі ай бойы өзара мықтыны анықтады. Қорытындыға сәйкес, қаражанбастықтар 36 ұпай жинап, турнир кестесінің бірінші сатысына тұрақтады.

Жарыс барысында команда мықты ойынымен, ұйымшылдығымен және жеңіске талпынысымен көзге түсті. Ортақ жетістіктен бөлек, жұмысшылар жеке шеберлігімен де ерекшеленді. Атап айтқанда, ішкі коммуникация тобының маманы Қылыш Қасым «Үздік ойыншы», технологиялық көлік департаментінің автомобиль жүргізушісі Абай Унайбаев «Үздік сұрмерген», ал бу өндіру цехының жөндеуші-слесарі Серік Үшқараев «Үздік қорғаушы» атанды.

Қаражанбас командасының кезекті жетістігі – ойыншылардың тұрақты дайындығы мен ұжым рухының жемісі. Жігіттер алдағы уақытта да үздіксіз жаттығып, байрақты бәсекелерде жеңіс туын желбіретуге ниетті.

«Қаражанбасмұнай» АҚ жұмысшылары еліміз үшін тарихи маңызды саяси оқиға – жаңа Конституция жобасы бойынша референдумға белсенді қатысып жатыр. Кен орнында таңғы сағат 6:00-ден бастап Түпқараған ауданына қарасты № 236 референдум учаскесі үздіксіз жұмыс істеп тұр.

Әнұран шырқалып, дауыс беруге рұқсат етілген соң ең алғашқы болып компанияның Бас директоры Нұртаза Ибрашев өз таңдауын жасады. Одан соң өзге де өндіріс цехтарының жұмысшылары кезекпен азаматтық ұстанымын білдіріп, бюллетендерін жәшікке тастады.

Қаражанбас мұнайшылары үшін учаскеде барлық қажетті жағдай жасалған. Дауыс беру процесі заң талаптарына сай, ашық жүріп жатыр. Еңбек адамдары бұл маңызды саяси науқанға белсенді қатысу – әр азаматтың ел болашағына бейжай қарамайтынын көрсететін жауапты қадам екенін атап өтті.

Вахтааралық демалыста жүрген және орталық кеңседе жұмыс істейтін қызметкерлер де өз тұрғылықты жері бойынша бекітілген учаскелеріне барып, дауыс беріп жатыр. Осылайша, Қаражанбас кен орнындағы мұнайшылар ел өміріндегі маңызды оқиғаға белсенді қатысып, азаматтық жауапкершіліктерін көрсетіп отыр.

«Қаражанбасмұнай» АҚ еңбекті қорғау, өндірістік қауіпсіздік және қоршаған ортаны қорғау мәселелеріне арналған HSE форумын өткізді. Шарада «ҚазМұнайГаз» ҰК АҚ өкілдері, ҚБМ басшылығы, өндірістік бөлімдер қызметкерлері және мердігер мекемелердің мамандары өндірістегі қауіпсіздік мәселелерін талқылады.

Форумға қатысушыларға алдымен әлемнің әр түкпірінде болған жазатайым оқиғалардың себеп-салдары баяндалған бейнеролик көрсетілді. Одан соң ҚБМ Басқармасы осы бағытта атқарылып жатқан жұмыс нәтижелері мен алдағы міндеттерге тоқталды. Бас директор Нұртаза Ибрашев құрылымдық бөлімшелер мен цех басшыларын «Қорғау» картасы бойынша жұмысты бірлесе нығайтуға шақырды.

«Өндіріс — кәсіби білімді, қатаң тәртіп пен технологиялық мәдениетті талап етеді. Бізді біріктіретін маңызды миссия — қауіпсіздік, ең бастысы адам өмірін сақтау. Бұл ең алдымен баршамыз үшін азаматтық жауапкершілік. Ешқандай баррель мұнай — адам өмірінен артық емес»,- деді Бас директор.

Нөлдік жарақат — мұнай өндіру, өңдеу, тасымалдау және қызмет көрсету салаларындағы мекемелердің барлығы үшін ең басты қағида. ҚМГ Өндірістік қауіпсіздік департаментінің директоры Ануарбек Каримов жиналғандарға еншілес және тәуелді ұйымдардағы жазатайым оқиғалар динамикасын таныстырды. Сондай-ақ ол қауіпсіздік ережелеріне бейжай қарамауды әр қызметкер өзінен бастауы керектігін ескертіп, HSE-дағы цифрлық трансформациялар туралы айтты.

Форум аясында қатысушылар үшін интерактивті сессиялар ұйымдастырылды. «Асар – команда құрудың ұлттық технологиясы» тақырыбындағы тренингте ұжымдық жауапкершілік пен өзара қолдаудың маңызы айтылды. Сонымен қатар дауларды шешу жолдары және командалық жұмысты дамытуға арналған тәжірибелік жаттығулар өткізілді.

Кездесу соңында компанияның 2026 жылға арналған HSE жол картасы таныстырылып, өндірістік қауіпсіздікті одан әрі жетілдіру бойынша бастамалар ұсынылды. Қатысушылар еңбек қауіпсіздігін арттыруға бағытталған жұмысты жауапкершілікпен жалғастыруға уағдаласты.

Таяу шығыстағы геосаяси жағдайға байланысты «ҚазМұнайГаз» ҰК» АҚ Басқарма төрағасының тапсырмасына сәйкес, Қаражанбас кен орнында төтенше жағдайға дайындықты тексеру мақсатында жоспардан тыс кешенді тактикалық оқу-жаттығу өтті. Жоспар бойынша мұнай дайындау және айдау цехындағы резервуарға ұшқышсыз ұшу аппараты арқылы соққы жасалды. Нәтижесінде РВС-1 резервуарында өрт шығып, бір адам зардап шекті. Сонымен қатар өрттің көршілес РВС-2 резервуарына таралу қаупі қарастырылды.

Оқу-жаттығуға компанияның апаттық-құтқару, өртке қарсы, медициналық, қауіпсіздік және өндірістік қызметтерінен 72 қызметкер мен 16 арнайы техника жұмылдырылды. Жаттығу кезінде қызметкерлерге жедел хабарлау, эвакуация, өртті оқшаулау және сөндіру, зардап шеккен адамды құтқару сияқты негізгі әрекеттер пысықталды. Сондай-ақ мемлекеттік органдармен өзара іс-қимыл тәртібі де тексерілді.

Қорытындыға сәйкес, барлық міндет ойдағыдай орындалып, шартты апат қысқа уақыт ішінде толық оқшауланды. Оқу-жаттығу компанияның төтенше жағдайларға әрекет ету жүйесінің дайын екенін көрсетті.

8 наурыз – Халықаралық әйелдер күніне орай Қаражанбаста еңбек ететін қыз-келіншектер құрметке бөленді. Таң атысымен компанияның ер азаматтары орталық кеңседе және вахтада жұмыс істейтін мұнайшы аруларды мерекемен құттықтап, гүл шоқтарын табыстап, жылы лебізін білдірді.

Мерекеде өмірін қара алтын игеруге арнап, ұзақ жылдар бойы адал еңбек етіп келе жатқан бірқатар әріптес марапатқа ие болды. Бас директор Нұртаза Ибрашев отбасынан жырақта жүріп, ерлермен иық теңестіре еңбек етіп жүрген мұнайшы аруларды арнайы құттықтап, олардың қажырлы еңбегін ерекше атап өтті. Одан соң бірқатар тәжірибелі қызметкерге жұмыстағы табандылығы, кәсіби біліктілігі және компанияның дамуына қосқан үлесі үшін «ҚазМұнайГаз» АҚ Басқарма төрағасының Алғыс хаты мен естелік белгісін табыс етті.

«Өндіріс – оңай сала емес. Жандарыңыз нәзік болса да, ел экономикасын өрге сүйреуге өлшеусіз үлес қосып келесіздер. Бұл – үлкен құрметке лайық еңбек. Сондықтан жылына бір келетін ең әдемі мерекеде ұжымдағы барлық ер азаматтардың атынан сіздерді шын жүректен құттықтаймын. Әрдайым еңбектеріңіз еленіп, табыстарыңыз еселене берсін! Көктемнің әр күні көңілге жылу, өмірге жаңа жетістіктер әкелсін!», – деді Н.Ибрашев.

ҚБМ-да 400-ге жуық қыз-келіншек жұмыс істейді. Олардың 150-ден астамы кен орнында вахталық әдіспен өндірістің түрлі саласында табысты еңбек етіп жүр. Нәзік жандылардың кәсібилігі, жауапкершілігі мен ұжымдағы белсенділігі компания жұмысының маңызды бөлігіне айналған.

Сонымен қатар мерекелік іс-шара барысында ҚМГ компаниялар тобының ардагерлері мен қызметкерлеріне мұнай-газ саласын дамытуға қосқан үлесі үшін «ҚазМұнайГаз» ҰК АҚ-ның естелік белгілері, құрмет грамоталары мен алғыс хаттары табысталды.

ҚМГ-да Халықаралық әйелдер күні қарсаңында мұнай-газ саласының дамуына елеулі үлес қосқан әйелдерге мемлекеттік наградалар салтанатты түрде табысталды.

ҚМГ Басқарма төрағасы Асхат Хасенов өзінің құттықтау сөзінде өндірісте еңбек етіп жүрген әйелдерге алғыс білдірді. Олардың қажырлы еңбегі мен мамандығына деген адалдығы елдің энергетикалық қауіпсіздігін нығайтуға ықпал ететінін атап өтті.

— Мемлекет басшысы Қасым-Жомарт Тоқаевтың Жарлығымен жұмысшы әйелдерге берілген мемлекеттік наградалар — бұл сіздердің мұнай-газ саласын дамыту жолында атқарған көп жылғы адал еңбектеріңіздің жоғары бағасы, — деді А.Хасенов.

«Құрмет» орденімен «Өзенмұнайгаз» АҚ №4 мұнай-газ өндіру басқармасы сорғы станциясының машинисі Шуақбаева Айсұлу Қошмаққызы марапатталды.

«Ерен еңбегі үшін» медалінің иегерлері:
Белоусова Людмила Матвеевна — «Павлодар мұнай-химия зауыты» ЖШС бақылау-өлшеу аспаптары және автоматика слесарі
Шегебаева Гүлсім Ізтұрғанқызы — «Oil Services Company» ЖШС «ЖетібайСервис» өндірістік басқармасының еңбекті ұйымдастыру инженері
Оразалиева Алмагүл Абатқызы — «Маңғыстаумұнайгаз» АҚ «Жетібаймұнайгаз» өндірістік басқармасының техник-геологы
Бухаева Жібек Рызабекқызы — «Ембімұнайгаз» АҚ «Жылыоймұнайгаз» МГӨБ мұнай-газ өндіру операторы
Азарян Зинаида Николаевна — «ҚазТрансОйл» АҚ Атырау мұнай құбыры басқармасының жетекші инженері
Баспаева Айнұр Танатбергенқызы — «ҚМГ Инжиниринг» ЖШС «ҚазҒЗЖИмұнайгаз» филиалының өнімді жинау, тасымалдау және дайындау жүйесі басқармасының сарапшысы
Өтенова Орынгүл Нұрмұханқызы — «Қаражанбасмұнай» АҚ химиялық талдау лаборанты.

Жаңа басшыны компанияның ұжымына «ҚазМұнайГаз» ҰК АҚ Басқарма төрағасының орынбасары Бекзат Абайылданов таныстырды.

Нұртаза Ибрашев 1984 жылы дүниеге келген.

Атырау мұнай және газ институтын «Мұнай және газ кен орындарын игеру» мамандығы бойынша тәмамдады.

Еңбек жолын бұрғышы көмекшісі болып бастады. Әр жылдары «КазбурГаз» және «Parker Drilling» компанияларында, Қашаған кен орны және Жемчужина сияқты халықаралық жобаларда, «Agip KCO», «Kаспий Mеруерті Oперейтинг Компани», «North Caspian Operating Company» мекемелерінде түрлі лауазымдарда жұмыс істеді.

2020-2022 жылдары ҚазМұнайГаз компаниялар тобында мұнай сервистік бағыттағы еншілес және тәуелді ұйымдарына жетекшілік етті.

Жаңа лауазымға тағайындалғанға дейін «Мұнайтелеком» ЖШС бас директоры қызметін атқарады.

«Қаражанбасмұнай» АҚ — ҚМГ-ның еншілес кәсіпорны. Компания Маңғыстау облысындағы Қаражанбас кен орнын игереді.