ҚАРАЖАНБАС МҰНАЙШЫСЫ – ТӨРТ ДҮРКІН ӘЛЕМ ЧЕМПИОНЫ

Сүйінші! «Қаражанбасмұнай» АҚ жұмысшысы төрт дүркін Әлем чемпионы атанды. №3 мұнай өндіру цехының операторы Нартай Алтыбаев Қытайдың Хайнин қаласында өткен кір тасын көтеру жарысында ерлер және ардагерлер арасында топ жарып, қос алтын медаль алды.

Байрақты бәсекеге әлемнің түкпір-түкпірінен ең мықты спортшылар жиналды. 73 келі салмақта өнер көрсеткен әріптесіміз 24 келілік кір тасын 10 минутта 213 рет көтерді. Бұл нәтижемен ол ерлер және 40-44 жастағы ардагерлер арасында үздік деп танылды. Өлке мұнайын игеруге атсалысып жүрген Нартай тек компаниямыздың емес, тұтас еліміздің абыройын асқақтатты.

«Әлем чемпионаты – ең ауқымды әрі кіл мықтылар сайысатын салмақты жарыс. Мұнда тұрақты жаттығу, техника және ерекше психологиялық дайындық қажет. Жарысқа барлығы жеңіс үшін келеді ғой. Бұл жолы да мақсатым айқын — жетістігімді жаңарту болды. Сеніммен үміт артқан жандарға мың алғыс!»,— деді Әлем чемпионы.

Нартай Алтыбаев – Халықаралық дәрежедегі спорт шебері. Ол негізгі қызметінен бөлек, жасөспірімдер мен әріптестерін кір тасын көтеруге баулып, талай чемпион шығарған бапкер. Спортты серік еткен мұнайшы әлі талай көк байрағымызды көкте желбіретуге ниетті.