«Қаражанбасмұнай» aкционерлік қоғамы

ҚМГ басшысы «Қаражанбасмұнай» АҚ-ны дамыту мәселелері бойынша жиын өткізді

Абай Түзелбай — Fri, 24 Jul 2026 16:38:00 +0000

«ҚазМұнайГаз» ҰК АҚ Басқарма төрағасы Асхат Хасенов Маңғыстау облысына жұмыс сапары барысында «Қаражанбасмұнай» АҚ-ға (ҚБМ) барып, кәсіпорынды одан әрі дамыту мәселелерін қарады.

Жиында мұнай өндірудің қазіргі көрсеткіштеріне, ресурстық базаны толықтыруға, стратегиялық жобаларды іске асыру барысына, цифрлық трансформацияға және әлеуметтік мәселелерге баса назар аударылды.

ҚБМ-ның ресурстық базаны толықтыруға бағытталған негізгі жобаларының бірі — Теңіз жағалауы аймағын дамыту. Бүгінде бұл учаскеде 8 бағалау және 12 пайдалану ұңғымасы бұрғыланды. Жобаны іске асыру геологиялық қорды 12 млн тоннаға дейін, ал өндірілетін қор көлемін 3 млн тоннаға дейін ұлғайтуға мүмкіндік береді.

Мұнай тұтқырлығының жоғары екенін ескере отырып, кен орнын игеру тиімділігін арттыру мәселесіне ерекше ден қойылды. Бу мен суды кезектестіріп айдауды қоса алғанда, бу-жылумен әсер ету технологиялары енгізіліп жатқан Шығыс учаскесін одан әрі дамыту мәселелері қаралды. Сондай-ақ өндірістік шығынды оңтайландыру және қабаттардан мұнай алу коэффициентін ұлғайту жөніндегі іс-шаралар талқыланды.

Басым бағыттардың бірі ретінде цифрлық трансформация мәселесі де қарастырылды. ҚБМ-да автопаркті басқаруды автоматтандыруға және аса қауіпті жұмыстарды бақылауға арналған цифрлық шешімдерді енгізу жалғасуда.

Кеңес барысында сондай-ақ ұзақ мерзімді өндірістік жобаларды іске асыру, мердігер ұйымдармен өзара іс-қимыл және қызметкерлердің әлеуметтік-тұрмыстық жағдайларын жақсарту мәселелері қаралды.

Жиын соңында Асхат Хасенов Теңіз жағалауы аймағын одан әрі игеруді қамтамасыз етуді, ресурстық базаны толықтыру, сондай-ақ заманауи технологиялар мен цифрлық шешімдерді енгізу, мұнай өндірудің тұрақты деңгейін сақтап тұру және өндірістік процестердің тиімділігін арттыру жөніндегі жұмыстарды жалғастыруды тапсырды.

Талап етілмеген өтімді ТМҚ сату туралы хабарландыру

Абай Түзелбай — Tue, 21 Jul 2026 10:15:14 +0000

«Қаражанбасмұнай» АҚ әлеуетті сатып алушыларды 3 лот мөлшерінде мүлікті сату бойынша бағаны өсіру әдісімен өтетін электрондық сауда-саттыққа қатысуға шақырады: «Талап етілмеген өтімді тауар-материалдық құндылықтар».

Электрондық сауда-саттықты өткізу күні мен уақыты: 05.08.2026ж., уақытымен сағат 11:00.

Электрондық сауда-саттық шарттары туралы толық ақпарат мемлекеттік мүлік тізілімінің веб-порталында көрсетілген (www.sauda.e-qazyna.kz).

Қосымша ақпаратты 8 (7292) 473828 телефоны бойынша алуға болады.

ҚБМ ЖАС МАМАНДАРЫ БІЛІМДІЛЕР САЙЫСЫНДА БАҚ СЫНАДЫ

Абай Түзелбай — Mon, 20 Jul 2026 10:11:57 +0000

«Қаражанбасмұнай»АҚ жас мамандары «ҚазМұнайГаз» ҰК» АҚ Маңғыстау облысындағы еншілес және тәуелді ұйымдарының арасында өткен интеллектуалдық quiz сайыстарына қатысты. Білімділер бәсекесін «ӨзенМұнайГаз» АҚ мен «МаңғыстауМұнайГаз» АҚ ұйымдастырды.

Жас мамандардан құралған командалар бақ сынаған сайыста «Қаражанбасмұнай» АҚ-ның жұмысшылары өздерінің білімі мен логикалық ойлау қабілетін жоғары деңгейде көрсетті. Олар зияткерлік тапсырмалар мен сұрақтарды сәтті орындап, лайықты нәтиже көрсетті.

Айта кетейік, мұндай интеллектуалдық сайыстар «ҚазМұнайГаз» ҰК» АҚ еншілес және тәуелді ұйымдарының жас мамандары арасындағы өзара ынтымақтастықты нығайтуға, тәжірибе алмасуға және кәсіби байланыстарды дамытуға ықпал етеді.

2026 ЖЫЛДЫҢ І ЖАРТЫЖЫЛДЫҒЫ БОЙЫНША «ҚАРАЖАНБАСМҰНАЙ» АҚ-дағы ӨНДІРІСТІҢ НЕГІЗГІ КӨРСЕТКІШІ

Абай Түзелбай — Thu, 09 Jul 2026 11:34:49 +0000

Қаражанбаста жыл басынан бері 1 018 084 тонна мұнай өндірілді. Бұл былтырғы І жартыжылдықтағы көрсеткіштен шамамен 39 мың тоннаға төмен.

Ал іске қосылған жаңа ұңғыма саны 27-ге жетіп, жұмыс жоспарға сай орындалды. Десек те, аталмыш дерек 2025 жылдың алғашқы алты айындағыдан 57 ұңғымаға аз.

Мұнай мен битум экспорты – 952 мың тонна. Сатылған мұнай көлемі 847 мың тонна болса, ішкі нарыққа 105 мың тонна битум жеткізілді. Жалпы есеп алғашқы жартыжылдыққа қойылған жоспардағы көрсеткіштен 12 мың тоннаға артық орындалды.

Талап етілмеген өтімді ТМҚ сату туралы хабарландыру

Абай Түзелбай — Thu, 02 Jul 2026 12:19:57 +0000

«Қаражанбасмұнай» АҚ әлеуетті сатып алушыларды мүлікті сату бойынша бағаны төмендету әдісімен өтетін электрондық сауда-саттыққа қатысуға шақырады: «Талап етілмеген өтімді тауар-материалдық құндылықтар».

Бастапқы бағасы – 76 011 823,44 (бағасы ҚҚС есебімен көрсетілген).

Электрондық сауда-саттықты өткізу күні мен уақыты: 16.07.2026ж., уақытымен сағат 10:00.

Электрондық сауда-саттық шарттары туралы толық ақпарат мемлекеттік мүлік тізілімінің веб-порталында көрсетілген (www.e-qazyna.kz).

Қосымша ақпаратты 8 (7292) 473828 телефоны бойынша алуға болады.

Металл сынықтарын сату туралы хабарландыру

Абай Түзелбай — Mon, 29 Jun 2026 06:34:58 +0000

«Қаражанбасмұнай» АҚ әлеуетті сатып алушыларды мүлікті сату бойынша бағаны өсіру әдісімен өтетін электрондық сауда-саттыққа қатысуға шақырады:
1) «Бұрын пайдалануда болған сорғы-компрессорлық құбырлар түріндегі металл сынықтары» – 747 тонна. Бастапқы бағасы – 35 856 000 теңге (1 тонна бағасы – 48 000теңге).

Электрондық сауда-саттықты өткізу күні мен уақыты: 10.07.2026ж., уақытымен сағат 10:00.

Электрондық сауда-саттық шарттары және сатылымға шығарылатын металл сынықтары туралы толық ақпарат мемлекеттік мүлік тізілімінің веб-порталында көрсетілген (www.e-qazyna.kz).

Қосымша ақпаратты 8 (7292) 473828 телефоны бойынша алуға болады.

Химиялық реагенттерді сатып алуда бәсекелестік ортаны кеңейту мақсатында «Қаражанбасмұнай» АҚ мұнайды дайындау кезінде мұнай эмульсиясын бұзуға арналған деэмульгаторды және қабат қысымын ұстап тұру жүйесіне коррозияға қарсы ингибиторды таңдау бағдарламасын іске қосып жатқанын хабарлаймыз.

Абай Түзелбай — Fri, 26 Jun 2026 03:42:04 +0000

Жоғарыда аталған химиялық реагенттерді іріктеу бағдарламасы «ҚазМұнайГаз» ҰК АҚ еншілес және тәуелді ұйымдарында химиялық реагенттерді сынауды, енгізуді және кіріс бақылауын таңдауды ұйымдастыру» әдістемесі бойынша жүзеге асырылады, яғни, келесі процедуралардан өту керек:

«Қаражанбасмұнай» АҚ зертханасында химиялық реагенттерді (ХР) іріктеу және сынауды (бөтелкедегі сынақ) жүргізу, 20.07.-18.09.2024ж. дейін өндірушілерден/ жеткізушілерден тікелей Қаражанбас кен орнында жаңадан таңдалған сынама бойынша (мұнай, газ-сұйық қоспа, су).
Өндірістік-техникалық Департаменттің өндірістік бөліміне, «Қаражанбасмұнай» АҚ кеңсесіне (602-кабинет) ілеспе құжаттамамен (сапа паспорты, коммерциялық ұсыныс), кемінде 0,5 литр көлемінде, 26.09.2026 ж. дейінгі мерзімде ХҚ-ның іріктелген үлгілерін ұсыну.
ХР үлгілерін кодтау және «ҚазҒЗЖИмұнайгаз» «KМГ Инжиниринг» ЖШС филиалының зертханасына тапсыру, 03.10.2026ж.
«ҚазҒЗЖИмұнайгаз» «КМГ Инжиниринг» ЖШС филиалының зертханасында тәуелсіз зертханалық және/немесе стендтік сынақтар жүргізу, 05.10.-09.11.2026ж. дейін. ХР сынауды өндірушілер/жеткізушілер есебінен қаржыландыру.
Алынған нәтижелерді талдау, түпкілікті есепті қалыптастыру, зертханалық сынақтардың оң нәтижелерімен, тәжірибелік-кәсіпшілік сынақтарды (ТКС) өткізуге 25.12.2026ж. дейінгі мерзімде іріктелген ХР жіберу туралы шешім қабылдау.
«Қаражанбасмұнай» АҚ өндірістік объектілерінде 2027 жылғы II-III тоқсанында «ҚазҒЗЖИмұнайгаз» «KМГ Инжиниринг» ЖШС филиалының техникалық қолдауымен кемінде 30 күнтізбелік күн мерзімге бекітілген ХР ТКС жүргізу.
«Қаражанбасмұнай» АҚ және «ҚазҒЗЖИмұнайгаз» «KМГ Инжиниринг» ЖШС филиалының бірлесіп қабылдаған шешіміне сәйкес ТКС оң нәтижелерін алу негізінде ХР өнеркәсіптік енгізуге рұқсат алу.

Қызығушылық танытқан жағдайда «Қаражанбасмұнай» АҚ-на ресми растау хатын жіберуіңіз керек.

Барлық сұрақтар бойынша «Қаражанбасмұнай» АҚ өндірістік-техникалық департаментінің өндірістік бөліміне хабарласыңыз:

Шарипов Шыңғыс Талғатұлы – өндірістік бөлімінің бастығы,

тел. 8 (7292) 47-31-24, E-mail: C_Sharipov@KBM.KZ

Үргешов Қанат Жақсылықұлы – өндірістік бөлімінің жетекші инженері,

тел. 8 (7292) 47-30-41, E-mail: K_Urgeshov@KBM.KZ

ҚБМ БАСҚАРМАСЫ БАҚ ӨКІЛДЕРІН КӘСІБИ МЕРЕКЕМЕН ҚҰТТЫҚТАДЫ

Абай Түзелбай — Thu, 25 Jun 2026 12:47:54 +0000

«Қаражанбасмұнай» АҚ өңір журналистерін 28 маусым – Бұқаралық ақпарат құралдары қызметкерлерінің кәсіби мерекесімен құттықтады. Басқарма облыстағы газет, телеарна және ақпараттық порталдардың редакторларымен, сондай-ақ республикалық телеарналардың меншікті тілшілерімен кездесіп, журналистиканың қоғамдағы маңызына тоқталды.

Кездесу барысында компания басшылығы БАҚ өкілдеріне ҚБМ қызметін, өндірістегі жетістіктер мен мұнайшылар еңбегін кеңінен насихаттауға қосып келе жатқан үлесі үшін алғыс білдірді. Сондай-ақ компанияның ақпараттық ашықтығын қамтамасыз етуге және мұнай саласы туралы мағыналы материалдар мен сапалы контент жасауға атсалысып жүрген бірқатар маман марапатталды.

Кездесуде БАҚ пен өндіріс орындары арасындағы серіктестіктің маңызы назардан тыс қалмады. ҚБМ Басқармасы журналистерді өңірдің әлеуметтік-экономикалық дамуы мен мұнай саласындағы оң өзгерістерді жариялау бағытындағы өзара байланысты одан әрі нығайтуға шақырды.

СПАРТАКИАДА ЖҮЛДЕГЕРЛЕРІ — КОМПАНИЯ МАҚТАНЫШЫ

Абай Түзелбай — Thu, 18 Jun 2026 12:20:06 +0000

«Қаражанбасмұнай» АҚ Бас директоры «ҚазМұнайГаз» ҰК АҚ компаниялар тобы қызметкерлері арасындағы дәстүрлі спартакиадада жоғары нәтиже көрсеткен жұмысшыларды арнайы қабылдап, жетістіктерімен құттықтады.

Кездесу барысында Нұртаза Ибрашев мұнайшылардың өндіріс пен спортты қатар ала жүріп, компания абыройын лайықты деңгейде қорғағанын жеткізді. Сондай-ақ, мұндай жетістіктер ұжымдағы салауатты өмір салтын насихаттауға және корпоративтік мәдениетті нығайтуға ықпал ететінін атап өтті.

Одан соң жарыста қола, күміс, алтын алған әріптестер мен белсенді қатысушыларыға ҚБМ Басқармасы мен Кәсіподақ комитеті атынан Құрмет грамотасы мен алғыс хаттар табысталды. Спортшылар көрсетілген қолдау үшін ризашылығын білдіріп, алдағы жарыстарда да жоғары нәтижелерге қол жеткізуге дайын екенін жеткізді.

ТЕОРИЯ КЕЗЕҢІ – МЫҚТЫЛАРДЫ ІРІКТЕУ АЛАҢЫ

Абай Түзелбай — Thu, 18 Jun 2026 12:15:27 +0000

Қаражанбас кен орнында І вахта қызметкерлері арасында дәстүрлі «Үздік маман – 2026» кәсіби шеберлік байқауының теория кезеңі өтті. Қатысушылар 24 аталым бойынша білім деңгейін сынап, тест тапсырмаларын орындады.

Мұнайшылар берілген уақыт ішінде өз мамандығына қатысты сұрақтарға жауап беріп, жоғары нәтиже көрсетуге талпынды. Байқаудың ашық әрі әділ өтуін арнайы комиссия мүшелері бақылап отырды.

Еске сала кетейік, байқаудың теория кезеңі бұған дейін ІІ вахта жұмысшылары арасында өтті. Тестілеу қорытындысы бойынша ең жоғары ұпай жинаған қатысушылар келесі кезеңге жолдама алады. Олар тәжірибелік сынақта кәсіби дағдыларын өндіріс алаңында көрсетіп, үздік маман атағы үшін бақ сынайды.

ҚАЙҒЫРЫП КӨҢІЛ АЙТАМЫЗ

Абай Түзелбай — Wed, 17 Jun 2026 09:51:32 +0000

«Қаражанбасмұнай» АҚ ұжымы өңірдегі мемлекеттік басқару және мұнай-газ саласының ардагері, компанияда Бас директордың кадр және әлеуметтік мәселелер жөніндегі орынбасары қызметін атқарған Рзаханов Асқар Киікбайұлының 65 жасқа қараған шағында мезгілсіз дүниеден өтуіне байланысты отбасы мен туған-туыстарына, жақындарына қайғырып көңіл айтады.

Асқар Киікбайұлы саналы ғұмырын ел дамуы мен өңірдің өркендеуіне арнаған білікті басшы ретінде көпшілік құрметіне бөленді. Ол еңбек жолын өндірісте бастап, кейін жастар саясаты, мемлекеттік басқару және мұнай-газ саласында жауапты қызметтер атқарды.

Әр жылдары Маңғыстау облысының ішкі саясат саласын басқарды, облыс әкімдігі құрылымында, ірі мұнай кәсіпорындарында басшылық лауазымдарда еңбек етті. «Маңғыстаумұнайгаз» АҚ Бас директорының әлеуметтік және әкімшілік мәселелер жөніндегі орынбасары, «Өзенмұнайгаз» АҚ Бас директоры, Маңғыстау облысы әкімінің аппаратының басшысы болды.

2019 жылдан бастап ҚБМ-да Бас директордың кадр және әлеуметтік мәселелер жөніндегі орынбасары қызметін атқарып, компанияның әлеуметтік және кадрлық саясатын дамытуға елеулі үлес қосты. Ол әріптестері арасында парасатты тұлға, білікті басшы, жастарға бағыт-бағдар берген тәлімгер ретінде есте қалды.

ҚМГ СПАРТАКИАДАСЫ: «ҚАРАЖАНБАСМҰНАЙ» АҚ ҚОРЖЫНЫНДА 7 ЖҮЛДЕ

Абай Түзелбай — Mon, 15 Jun 2026 12:49:35 +0000

Ағымдағы жылдың 12-15 маусым аралығында Астана қаласында «ҚазМұнайГаз» ҰК АҚ компаниялар тобының дәстүрлі Спартакиадасы өтті. Ауқымды спорттық додаға ҚМГ-ның 39 еншілес және тәуелді ұйымынан 900-ден астам қызметкер қатысып, спорттың 14 түрі бойынша бақ сынады.

Жарыста «Қаражанбасмұнай» АҚ қызметкерлері жоғары нәтижелер көрсетіп, қоржынға 7 бірдей жүлде салды. Компания спортшылары жеңіл атлетика, тоғызқұмалақ, армрестлинг, садақ ату және футзал бойынша жүлделі орындарға ие болды.

Жеңімпаздар тізімі:

Жеке жүгіру (ерлер, 35 жастан жоғары, 800 м):
1-орын – Әлібек Құлболғанов

Жеке жүгіру (әйелдер, 18-34 жас, 400 м):
2-орын – Азиза Конисова

Армрестлинг (әйелдер, 65 кг дейін):
3-орын — Құралай Ақжігітова

Тоғызқұмалақ (ерлер):
2-орын — Нұрсұлтан Орақов

Тоғызқұмалақ (әйелдер):
3-орын — Жанар Юсупова

Садақ ату (әйелдер):
3-орын — Салима Гаржаубаева

Футзал:
3-орын — «Қаражанбасмұнай» АҚ